“Seventh-day” Sawi Fiahna
- “Seventh-day” tih chu “Ni sarih ni” tihna a ni a;
- “Seventh-day-hote,” tih chu “Nisarih ni Serhtute,” tihna a ni.
Mi Ṭhenkhatin Seventh-day-hote An Sawi Dan
Mi ṭhenkhat chuan, Seventh-day hote chu, 'Rinna kawng dik lo zawha kal sual, Dân zawm leh thiltih vânga chhandam nih tumhote,' tia sawiin, an sâwt hle ṭhin a ni. Chutiang chu an ni reng em? Tute nge Seventh-day-hote chu? tih tawi tein lo tar lang ila.
Tute Nge Sabbath Lo Serh Ṭhin?
Tu tute nge Sabbath serh ṭhin tih hriat nan Bible sawi dan i lo bel chiang teh ang.
Pathian
Kan Bible hi ngun tak leh chik zàwka kan zir chuan, a ni sarih ni, Chawlhni atâna siamtu leh, a serhtu hmasa berte chu, Pa Pathian leh a Fapa, Isua Krista chu an ni tih heti hian min hrilh a ni. “Tin, Pathianin ni sarih niah chuan a thil siam chu a ti zo va: ni sarih niah chuan a thil siam zawng zawng chu a chawlhsan ta a. Tichuan, Pathianin ni sarih ni chu mal a sawm a, a serh ta a,” tiin (Gen 2:2, 3).
Tichuan, Pa leh a Fapa chu, a ni sarih ni serhtu, Seventh-day hmasa ber an ni tihna a nih chu. Tichuan, Pa leh a Fapa Isua chu, Seventh-day an nih si chuan, a Thlarau Thianghlim pawh chu, a bâng bik lo tihna a ni: an zain, pumkhat an ni si a.
Tichuan, Pa leh Fapa leh Thlarau Thianghlim chu Seventh-day din chuaktu leh, an hruaitu hmasa berte an ni a, tunah pawh an la ni reng ang em? an la ni zui zel ang em? Bible-ah chuan heti hian kan hmu a: “Isua Krista chu niminah nen vawiinah nen kumkhua pawhin a pângngaiin a awm fo vang,” tiin (Heb 13:8). Seventh-day ata an la bâng rih lo va, engtikah mah an ban hmel lo a nih chu.
Adama
Tin, Chawlhni atâna a ni sarih ni thlangtu leh siamtu Isua chuan, “Chawlhni hi Mihring tana siam a ni,” a ti a (Marka 2:27). Tin, mihring hmasa ber chu ‘Adama a ni,’ tih a nih avângin, Adama pawhin a serh ve ngei ang tih chu hai rual a ni lo.
Nova
Tin, mi fel, Nova chuan, tui let lai khan, tui a kam tawh leh kam loh hriat nâna savate a thlawh chhuahtir khân, ni sarih dang a nghak leh zêl ṭhin a; chu chuan, ni sarih chawlhkar hi an lo hre tawh ṭhin tih a rin theih a, Sabbath pawh an serh a rinawm (Gen 8:8, 12).
Abrahama
Tin, he leia koh hran hmasak ber, rinnaa kan pa Abrahama chu, Pathian dân leh a thupèk zawng zawng te, fel taka zawmtu a nihzia, Pathian ngeiin heti hian a sawi a, “Abrahama chuan ka thu a awih a, ka thu hrilhte, ka thupèkte, ka thuruatte, ka dânte pawh a zawm avâng khan,” a ti a (Gen 26:5). Abrahama chu Pathian thupèk leh a dânte zâwmtu a nih avângin, Dân zinga a palina Sabbath serhtu, Seventh-day a ni ngei tih chu a chiang tawk hle bawk.
Israelte
Tin, Isua chuan, Sinai tlânga, A mi Israelte a hruai laia, manna-a a châwm lai pawh khan, a ni sarih ni a serhzia leh a ngaih pawimawhzia chu, thiltih mak chi thum hmangin chawlhkar tin a hriattir ziah ṭhin a nih kha (Exo 16:22, 26). Tin, kum sawmli chhûng khan, a ni sarihni chu vawi khat mah a thlàksak duh miah lo a ni.
Zawlneite leh Bible Ziaktu Zawng Zawng
Tin, hruaitu ropui, Mosia te, Joshua te leh, Israel mipui zawng zawng te pawh kha, a ni sarih ni serhtu Seventh-day-hote vek an ni. Tin, tun hmaa Pathian Zawlnei tinrêngte leh Bible ziaktu zawng zawng te pawh kha Seventh-day lo pakhat mah an awm lo.
Isua, Tirhkohte, Kristian Hmasate Zawng Zawng
Tin, Isua chu Adama hunah te, Sinai tlânga Israel fate manna-a a châwm ṭhin laite pawh khân, Sabbath serh zêl ṭhintu Seventh-day a ni reng zel a. Tin, he leia a lo kal lai pawh khan, Sabbath serhtu Seventh-day a la ni reng tho va. “Tin, a sei lenna khua Nazaret chu a lo thleng a; tin, Chawlhnia a tih dân pângngaiin inkhâwmna inah a lût a, chhiar tûrin a ding a,” tiin min hrilh a (Lk 4:16). Chuvangin kan Lalpa Isua pawh kha, Sabbath ni-a inkhawmna ina kal chu, a tih dân pangngai a la ni a. Tin, a zirtîrte pawh kha Sabbath niah chuan thupèk angin an châwl a ni tih min hrilh bawk (Luka 24:1). Tin, Paula leh a enkawl ṭhin, kohhran hmasate zawng zawng pawh kha Sabbath serhtu Seventh-day hote an ni vek bawk (Tirh. 17:2; 18:4).
Tu Nge Sabbath Serh Duh Hauh Lo?
Bible-a hming lang ve fo ṭhin, Seventh-day ni ve duh hauh lo an awm ve tlat mai a ni: chung Seventh-day pâwla tel ve duh lo pawl dangte chu, Setana leh a hote chu an ni. Tun thleng pawh hian an la do tlat mai a ni.
Tu Nge Sabbath Ngai Hlu?
Pathianin A thilsiam tinrêng, a ena ṭha a tih êm êmte zingah khan, mal a sâwma a tihthianghlim kher kha chu, a chawlhni hi a ni a. Chuvângin, thilsiam ni dang zawng zawngte ai chuan, a chawlhni chu a ngaihluin a dah chungnung bik tih chu a chiang tawk hle a ni.
Sabbath Chu Tute Tana Siam Nge?
Chutia Isua Krista ngeiin a ngaih hlut bik êm êm, a ni sarih ni Sabbath chawlhni chu, mihringte tana siam a ni tih min hrilh a ni (Marka 2:27). Chuvangin, “Chawlhni hi thianghlim taka serh tûr a ni tih hre reng rawh,” tiin thu min pe bawk a (Ex. 20:8, 11).
Chu ni, Pa leh a Fapain, ni dangte aia an ngaih hlut bik leh an serh êm êm, keini pawh serh ve ngei tûra min phut, a ni sarih ni chu, keinin kan lo ngaihnepa kan lo rah beh mai mai chuan, amah ngaineptu leh a thupèkte dodaltu kan ni tihna a ni ang.
Sabbath Serh Loh Chu A Pawi Em Ni?
Isua chuan, “Tupawh ka lama ṭang lo chu min dotu a ni a, tupawh mi làk khawmpui lo chuan a tidarh a ni,” a ti si a (Luka 11: 23). Chuvângin a ni sarih ni Sabbath, amahin a ngaih hlut êm êm leh a serh ṭhin chu lo ṭawmpui ve duh lova, ni dang kan lo serh zawk daih si chuan, Amah nên inpumkhat thei lovin, amah Sabbath Lal chu, kan lal atân kan duh lova kan hnawl tihna a ni, a duh zawng duhpui ve lova hnial kalhtu chu kan ni tihna a ni.
Sawmna
“Lalpa chuan heti hian a ti a, Kalkawngahte chuan ding ula, en rawh u, Kawng ṭha awmna KAWNG HLUN te chu zawt rawh u, tah chuan kal ula, in thlarau tân chawlhna in hmu ang,” tiin mi tinte hi kawng hlun, nunna kawng lam chu zawh turin min sawm ṭheuh a ni (Jer. 6:16). Chumi thu chuan, tun hmaa mi thianghlim zawng zawngte leh, Isua leh a zirtîrte pawhin an lo zawh ṭhin kawng ṭha leh KAWNG HLUN, Sabbath serhna kawng ngei kha zawh ve turin mi tinte hi min sawm ṭheuh a ni. Nang pawh, kan Lalpa hniakhnung chu zuiin, chu kawng ṭha leh kawng hlun chu i zawh ve thei dawn lawm ni?
************
No comments:
Post a Comment