Seventh-day-hote Chu

“Seventh-day” Sawi Fiahna

• “Seventh-day” tih chu “Ni sarih ni” tihna a ni a;
• “Seventh-day-hote,” tih chu “Nisarih ni Serhtute,” tihna a ni.

Mi Ṭhenkhatin Seventh-day-hote An Sawi Dan

Mi ṭhenkhat chuan, Seventh-day hote chu, 'Rinna kawng dik lo zawha kal sual, Dân zawm leh thiltih vânga chhandam nih tumhote,' tia sawiin, an sâwt hle ṭhin a ni.  Chutiang chu an ni reng em? Tute nge Seventh-day-hote chu? tih tawi tein lo tar lang ila. 

Tute Nge Sabbath Lo Serh Ṭhin?

Tu tute nge Sabbath serh ṭhin tih hriat nan Bible sawi dan i lo bel chiang teh ang.

Pathian

    Kan  Bible hi ngun tak leh chik zàwka kan zir chuan, a ni sarih ni, Chawlhni atâna siamtu leh, a serhtu hmasa berte chu, Pa Pathian leh a  Fapa, Isua Krista chu an ni tih heti hian min hrilh a ni.  “Tin, Pathianin ni sarih niah chuan a thil siam chu a ti zo va: ni sarih niah chuan a thil siam zawng zawng chu a chawlhsan ta a.  Tichuan, Pathianin ni sarih ni chu mal a sawm a, a serh ta a,” tiin (Gen 2:2, 3).

    Tichuan, Pa leh a Fapa chu, a ni sarih ni serhtu, Seventh-day hmasa ber an ni tihna a nih chu.  Tichuan,  Pa leh a  Fapa  Isua chu, Seventh-day an nih si chuan, a Thlarau Thianghlim pawh chu, a bâng bik lo tihna a ni:  an zain, pumkhat an ni si a.

    Tichuan, Pa leh Fapa leh Thlarau Thianghlim chu Seventh-day din chuaktu leh, an hruaitu hmasa berte an ni a, tunah pawh an la ni reng ang em? an la ni zui zel ang em? Bible-ah chuan heti hian kan hmu a: “Isua Krista chu niminah nen vawiinah nen kumkhua pawhin a pângngaiin a awm fo vang,” tiin (Heb 13:8). Seventh-day ata an la bâng rih lo va, engtikah mah an ban hmel lo a nih chu. 

Adama

    Tin, Chawlhni atâna a ni sarih ni thlangtu leh siamtu Isua chuan, “Chawlhni hi Mihring tana siam a ni,” a ti a (Marka 2:27). Tin, mihring hmasa ber chu ‘Adama a ni,’ tih a nih avângin, Adama pawhin a serh ve ngei ang tih chu hai rual a ni lo.

Nova

Tin, mi fel, Nova chuan, tui let lai khan, tui a kam tawh leh kam loh hriat nâna savate a thlawh chhuahtir khân, ni sarih dang a nghak leh zêl ṭhin a; chu chuan, ni sarih chawlhkar hi an lo hre tawh ṭhin tih a rin theih a, Sabbath pawh an serh a rinawm (Gen 8:8, 12).

Abrahama

Tin, he leia koh hran hmasak ber, rinnaa kan pa Abrahama chu, Pathian dân leh a thupèk zawng zawng te, fel taka zawmtu a nihzia, Pathian ngeiin heti hian a sawi a, “Abrahama chuan ka thu a awih a, ka thu hrilhte, ka thupèkte, ka thuruatte, ka dânte pawh a zawm avâng khan,” a ti a (Gen 26:5).   Abrahama chu  Pathian thupèk leh a dânte  zâwmtu a nih avângin, Dân zinga a palina Sabbath serhtu, Seventh-day a ni ngei tih chu a chiang tawk hle bawk. 

Israelte

Tin, Isua chuan, Sinai tlânga, A mi Israelte a hruai laia, manna-a  a châwm lai pawh khan, a ni sarih ni a serhzia leh a ngaih pawimawhzia chu, thiltih mak chi thum hmangin chawlhkar tin a hriattir ziah ṭhin a nih kha (Exo 16:22, 26).  Tin, kum sawmli chhûng khan, a ni sarihni chu vawi khat mah a thlàksak duh  miah lo a ni.

Zawlneite leh Bible Ziaktu Zawng Zawng

Tin, hruaitu ropui, Mosia te, Joshua te leh, Israel mipui zawng zawng te pawh kha, a ni sarih ni serhtu Seventh-day-hote vek an ni. Tin, tun hmaa Pathian Zawlnei tinrêngte leh Bible ziaktu zawng zawng te pawh kha Seventh-day lo pakhat mah an awm lo. 

Isua, Tirhkohte, Kristian Hmasate Zawng Zawng

Tin, Isua chu Adama hunah te, Sinai tlânga Israel fate manna-a a châwm ṭhin laite pawh khân,  Sabbath serh zêl ṭhintu Seventh-day a ni reng zel a.  Tin, he leia a lo kal lai pawh khan, Sabbath serhtu Seventh-day a la ni reng tho va. “Tin, a sei lenna khua Nazaret chu a lo thleng a; tin, Chawlhnia a tih dân pângngaiin inkhâwmna inah a lût a, chhiar tûrin a ding a,” tiin min hrilh a (Lk 4:16). Chuvangin kan Lalpa Isua pawh kha, Sabbath ni-a inkhawmna ina kal chu, a tih dân pangngai a la ni a.  Tin, a zirtîrte pawh kha Sabbath niah chuan thupèk angin an châwl a ni tih min hrilh bawk (Luka 24:1).  Tin, Paula leh a enkawl ṭhin, kohhran hmasate zawng zawng pawh kha Sabbath serhtu Seventh-day hote  an ni vek bawk (Tirh. 17:2; 18:4).

Tu Nge Sabbath Serh Duh Hauh Lo?

Bible-a hming lang ve fo ṭhin, Seventh-day ni ve duh hauh lo an awm ve tlat mai a ni:  chung Seventh-day pâwla tel ve duh lo pawl dangte chu, Setana leh a hote chu an ni.  Tun thleng pawh hian an la do tlat mai a ni.

Tu Nge Sabbath Ngai Hlu?

    Pathianin A thilsiam tinrêng, a ena ṭha a tih êm êmte zingah khan, mal a sâwma a tihthianghlim kher kha chu, a chawlhni hi a ni a.  Chuvângin, thilsiam ni dang zawng zawngte ai chuan, a chawlhni chu a ngaihluin a dah chungnung bik tih chu a chiang tawk hle a ni.

Sabbath Chu Tute Tana Siam Nge?

Chutia Isua Krista ngeiin a ngaih hlut bik êm êm, a ni sarih ni Sabbath chawlhni chu, mihringte tana siam a ni tih min hrilh a ni (Marka 2:27).  Chuvangin,  “Chawlhni hi thianghlim taka serh tûr a ni tih hre reng rawh,” tiin thu min pe bawk a (Ex. 20:8, 11).

Chu ni, Pa leh a Fapain, ni dangte aia an ngaih hlut bik leh an serh êm êm, keini pawh serh ve ngei tûra min phut, a ni sarih ni chu, keinin kan lo ngaihnepa kan lo rah beh mai mai chuan, amah ngaineptu leh a thupèkte dodaltu kan ni tihna a ni ang.

Sabbath Serh Loh Chu A Pawi Em Ni?

Isua chuan, “Tupawh ka lama ṭang lo chu min dotu a ni a, tupawh mi làk khawmpui lo chuan a tidarh a ni,” a ti si a (Luka 11: 23).  Chuvângin a ni sarih ni  Sabbath, amahin a ngaih hlut êm êm leh a serh ṭhin chu lo ṭawmpui ve duh lova, ni dang kan lo serh zawk daih si chuan, Amah  nên  inpumkhat thei lovin, amah Sabbath Lal chu, kan lal atân kan duh lova kan hnawl tihna a ni, a duh zawng duhpui ve lova hnial kalhtu chu kan ni tihna a ni.

Sawmna

“Lalpa chuan heti hian a ti a, Kalkawngahte chuan ding ula, en rawh u, Kawng ṭha awmna KAWNG HLUN te chu zawt rawh u, tah chuan kal ula, in thlarau tân chawlhna in hmu ang,” tiin mi tinte hi kawng hlun, nunna kawng lam chu zawh turin min sawm ṭheuh a ni (Jer. 6:16).  Chumi thu chuan, tun hmaa mi thianghlim zawng zawngte leh, Isua leh a zirtîrte pawhin an lo zawh ṭhin kawng ṭha leh KAWNG HLUN, Sabbath serhna kawng ngei kha zawh ve turin mi tinte hi min sawm ṭheuh a ni.  Nang pawh, kan Lalpa hniakhnung chu zuiin, chu kawng ṭha leh kawng hlun chu i zawh ve thei dawn lawm ni?

************

Thu Lakna: Seventh-day Hote Chu, by Pu Hualliana

Baptisma Thutiam (Myanmar SDA, 1987)

Ni Hnuhnunga Pathian Thuchaha Nghehna Atana Inkaihhruaina Dante

"Mite Tan Chhinchhiahna Tarchhuak Rawh U." Isa. 62:10.

1. Bible pumpui hi Pathian thawkkhum nia ringin, hei chauh hi i rinna nghahchhanah i pawm em? A zirtirna ang zela kal zel i tum tlat em? T. T. 20:32.
2. Sual laka i Chhandamtu tak atan Lal Isua chu i pawm tawhin, thinlung pian thar takzet nan, nangmahah A Thlarau Thianghlima nitin A chen i phal ang em? Joh. 1:12, 13: Gal. 2:20.
3. I sualna i hriat zawng zawng Pathian hmaah i puangin i sim tawh em? Krista zarah A ngaidam tawh chein i ring em? I mihringpuite lakah i theih ang tawkin thil engkim i tifel vek tawh em? I Joh. 1:9; Matt. 5:23-26; Eze. 33:15.
4. Pathian khawngaihnaa Kristian nun dika nuna, rilru leh taksa leh thlarau engkim Pathian hnena pumpek veka, engkimah a lawmzawng tiha, Pathian thupek zawng zawng zawm tlat i tum em? Rom. 12:1; Kol. 3:17; Thup. 14:12.
5. Nitina Pathian Thu zira tawngtaiin thlarau lam nunna dik neih reng i tumin, thianghlim taka i nunna leh nangma beihna ngeia Krista tana mite hneh i tum em?
6. Pathian thutak ropui, A taksa, hmuh theih ngeia Krista lokal leh ngei turte (Thup. 1:9-11); Krista zarah chauhan thihtheihlohnate (2 Tim. 1:10); mitthiten engmah an hre lo tih te (Thuh. 9:5, 6); misualte tihboralna te (Mal. 4:1-3); leh a zawmpui thudik dang Thup. 14:6-12. a thuchah bik nena inhlawmkhawmte chu i ringin i pawm em?
7. Thupek palina angin, Zirtawp nitlak atanga Inrinni nitlak inkar, hapta khata ni sarihna hi Lalpa ni thianghlim anga vawn i tum em? Luka 23:56; Ex. 20:8-11.
8. Bible remruatna anga Pathian rawngbawlna chawmna atan i hlawkna zawng zawng atangin sawma pakhat A hnena pein (Lev. 27:30; Mal. 2:8-10); A malsawmna i dawn ang zela i theih ang taka thawhlawm thawh zel i tum em? Deut. 16:17; Luka. 6:38.
9. Pathian ropuina tur hlira ei leh in tura thupek zawm leh (1 Kor. 30:31) zu ruih theih chi reng reng (Thuf. 23:29-32) te; engkawng pawha vaihlo hman te (1 Kor. 3:16, 17); vawksa te (Isa. 66:15, 17); ruih theih lam thil, thingpui, kawfi leh taksa tichhe thei chi nghei vek i tum em?
10. Bible-in a sawi anga inchei dan tha zawm a, bengbeh leh thi chi engpawh, banbun leh zungbun etc. nena hman loh va, Bible-in mawi tawk a tih aia silhfen tlem lutuk inbel lohte hi i peih ang em? (1 Time. 2:9, 10; 1 Pet. 3:3, 4; Ex. 33:5, 6; Gen. 35:2-4.)
11. Inngaihtlawmna rawngbawl; (Johana 13:1-17) Lalpa zanriahte hi i ringin i pawm em? I Kor. 11:23-33.
12. 2 Kor. 6:7-a Pathian thupek zawm a, khawvel ata inthiarfihlima, khawvel thilsual lamte, lehkhadente, cinema ente, thawnthu phuahchawp chhiarte leh thildang engpawh, sawisel kai thei chi reng reng bansan vek i tum ang em? Jak. 1:27; 4:4.
13. Kohhran thanlenna turin, thinlung taka Sabbath Skul ngaisanga, thiltiha chawm leh a theih phawt chuan Kohhran inkhawmna apianga tel i tum em? Tin, Pathian tanpuiin Kohhrana i chanpual tih zel i tum em? Luka 4:16; Rom 12:4-8.
14. A bang la awm Kohhran hian Hrilhlawkna Thlarau a neia, chu chu he Kohhranah hian Pi White-i lehkha ziak atangin tihlan a ni tih i pawm em?
15. Tuia hnimpil baptisma chauh hi i ringin, i Lalpa leh Zirtirtu chu he dan thianghlim ang hian zui turin i inpeih em? Matt. 28:18-20; Kol. 2:12; Rom 6:3-5.

KA THUTIAM

    Pathian hnena inpumpek tak zetin, heta A rawngbawl leh A hnena kumkhuaa awm duh tak zetin, heng inkaihhruaina dan thutakte hi ka pawm tih leh A khawngaihnain ka zawm a ni tih hetah hian ka puang e.
    Ni ..............................................
Hming ...........................................
Khua .............................................
Dist. ..............................................



Hei hi 1987 kuma Myanmar SDA kohhran Baptisma Certificate phek hnung lama mi a ni.

A kungkaihte:

1. Baptisma Thutiam (Mizoram, 2021)
2. Baptismal Vow (Mizoram, 2021)
   

Baptismal Vow

1. Do you believe there is one God: Father, Son, and Holy Spirit, a unity of three coeternal Persons?
2. Do you accept the death of Jesus Christ on Calvary as the atoning sacrifice for your sins and believe that by God’s grace through faith in His shed blood you are saved from sin and its penalty?
3. Do you accept Jesus Christ as your Lord and personal Savior, believing that God, in Christ, has forgiven your sins and given you a new heart, and do you renounce the sinful ways of the world?
4. Do you accept by faith the righteousness of Christ, your Intercessor in the heavenly sanctuary, and accept His promise of transforming grace and power to live a loving, Christ-centered life in your home and before the world?
5. Do you believe that the Bible is God’s inspired Word, the only rule of faith and practice for the Christian? Do you covenant to spend time regularly in prayer and Bible study?
6. Do you accept the Ten Commandments as a transcript of the character of God and a revelation of His will? Is it your purpose by the power of the indwelling Christ to keep this law, including the fourth commandment, which requires the observance of the seventh day of the week as the Sabbath of the Lord and the memorial of Creation?
7. Do you look forward to the soon coming of Jesus and the blessed hope, when “this mortal shall … put on immortality” [1 Cor. 15:54, KJV]? As you prepare to meet the Lord, will you witness to His loving salvation by using your talents in personal soul-winning endeavor to help others to be ready for His glorious appearing?
8. Do you accept the biblical teaching of spiritual gifts and believe that the gift of prophecy is one of the identifying marks of the remnant church?
9. Do you believe in Church organization? Is it your purpose to worship God and to support the Church through your tithes and offerings and by your personal effort and influence?
10. Do you believe that your body is the temple of the Holy Spirit; and will you honor God by caring for it, avoiding the use of that which is harmful, and abstaining from all unclean foods; from the use, manufacture, or sale of alcoholic beverages; from the use, manufacture, or sale of tobacco in any of its forms for human consumption; and from the misuse of or trafficking in narcotics or other drugs?
11. Do you know and understand the fundamental Bible principles as taught by the Seventh-day Adventist Church? Do you purpose, by the grace of God, to fulfill His will by ordering your life in harmony with these principles?
12. Do you accept the New Testament teaching of baptism by immersion and desire to be so baptized as a public expression of faith in Christ and His forgiveness of your sins?
13. Do you accept and believe that the Seventh-day Adventist Church is the remnant church of Bible prophecy and that people of every nation, race, and language are invited and accepted into its fellowship? Do you desire to be a member of this local congregation of the world Church?

Hming ________________

Date __________________

Address _______________

______________________

PREPARED BY MIZO CONFERENCE OF SEVENTH-DAY ADVENTISTS, AIZAWL

A chunga thu ziah khi Mizo ṭawng Baptisma Thutiam lehkha phek hnung lama inziak a ni.

Baptisma Thutiam

Kei a hnuaia hming ziaktu hian, heng zawhnate hi remtiin ka chhang e:

1. Pathian pakhata Mipathum: Pa, Fapa, leh Thlarau Thianghlim, chatuana pumkhata awm hi i ring em?
2. Kalvaria Isua Krista thihna chu, nangma sual tlenfaina a ni tih pawmin, Pathian khawngaihna zarah, A thisen chhuak i rinna avangin sual leh sual vanga hremna lakah chhandam i ni ta tih i ring em?
3. Krista chu i Lal leh nangma mimal Chhandamtuah pawmin, Pathianin Krista-ah i sualnate ngaidam tawhin, thinlung thar A pe tawh che tih ringin, khawvel sualna kawngte chu i bansan em?
4. Van biakbuk chhunga nangmah Sawipuitu che, Krista felna chu rinnaa pawmin, chhungkuaah leh khawvel hmaa Krista laipuia nei nun duhawm tak chu i nunpui theih nan, A khawngaihna leh thiltihtheihna thutiam chu i pawm em?
5. Bible hi Pathian thawkkhum Thu, Kristian tan chuan rinna leh thiltih tehfung awm chhun chu a ni tih ringin, Bible zir leh ṭawngṭai nana hun hmang ṭhin turin thu i thlung em?
6. Thu sawmpek hi Pathian nungchang ziahchhuaha awm, A duhzawng puanchhuahna chu a ni tih pawmin, nangmaha Krista thiltihtheihna awm zarah, he dan hi, Thupek palina, kar khata ni sarihna chu Lalpa Chawlhni a nihna leh Thilsiam hriatrengna a nih anga serh tura min ngiatna telin, vawn i tum em?
7. Isua lo kal leh thuaina tur hi beiseina lawmawm, 'he thi thei hian ... thihtheih lohna a sin hun tur' a nihna anga nghakhlel taka thlirin, Lalpa tawk tura lo inbuatsaih chungin, ropui taka A lo kal lehna tawk tura mi dangte pawh lo inpeih tura ṭanpui nan, thlarau hnehna kawnga i theihnate hmangin, A hmangaihnaa chhandamna thuhretu nih zel i tum a ngem?
8. Thlarau lam thilpekte chungchanga Bible zirtirna hi pawmin, hrilhlawkna thilpek hi Kohhran la bang chhinchhiahnate zinga pakhat chu a ni tih i ring em?
9. He kohhran pawla insiam hi pawmin, Pathian chibaibuk a, kohhran chu i sawmapakhat te, thawhlawm dangte leh i theihnate leh ṭhahnemngaihnatea dawm chhoh zel i tum em?
10. I taksa hi Thlarau Thianghlim In a ni tih ringin, ṭha taka enkawlin, taksa tana ṭhat lohna neite hmang lova, eitur thianghlim lo zawng zawng lak aṭanga inthiar fihlimin, zu hman, siam chhuah emaw hralh emaw leh, vaihlo mihring hman atana siam chi reng reng hman, siamchhuah emaw hralh emaw leh, ruihhlo hman dik lohna chi hrang hrang lak aṭanga fihlimin, Pathian i chawimawi em?
11. Bible zirtirna tlangpuite, Seventh-day Adventist Kohhranin a zirtir chu hria a, manthiamin, Pathian khawngaihna azarah, chung zirtirna rema nun chhoh zel chu i tum tlat em?
12. Thuthlung Thar zirtirna anga hnimphuma baptisma chan hi pawmin, Krista i rinna leh i sualnate A ngaihdam tawhna che, vantlang hmaa tarlan nan hnimphuma baptisma chan chu i duh em?
13. Seventh-day Adventist Kohhran hi Bible hrilhlawkna anga kohhran la bang chu a ni tih pawmin, hnam tin, chi tin leh ṭawng tina mite chu, he pawla lo tel tur sawm leh pawm an ni tih ringin, khawvel pum huap kohhrana a peng pakhat, he tualchhung kohhran member nih chu i duh em?

Hming ________________

Date __________________

Address _______________

______________________

PREPARED BY MIZO CONFERENCE OF SEVENTH-DAY ADVENTISTS, AIZAWL

 

Hei hi 2021 kuma Mizoram SDA kohhranin baptisma chang hlim member-te hnena Baptisma Certificate an pek ruala lehkha phek dang an pek, a phek lehlama inziak a ni.

A phek lehlam chu Sap ṭawngin a inziak a, i chhiar duh chuan hetah hian lut la: Baptismal Vow

 

 

 

Seventh-day Adventists Kohhran Thurin 28-te

(The 28 Fundamental Beliefs of Seventh-day Adventists)

1.   Pathian Lehkhabu Thianghlimte:

Seventh-day Adventist-te Chuan…

Pathian Lehkhabu Thianghlimte, Thuthlung Hlui leh Thuthlung Thar te hi Thlarau Thianghlimin a pawl ang zela thusawia ziak ṭhin Pathian mi thianghlimte Pathianin a thawkkhumna aṭanga A pek, Pathian Thute an ni.  He thu hmangin, chhandamna atana hriat tur pawimawhte chu Pathian chuan mihringte hnenah a hlan a ni.  Pathian Lehkhabu Thianghlim hi dik lo thei loa Pathian duhdan puan chhuahna a ni, thuneihna nena thurin puang chhuaktu leh hun kal tawha Pathian thiltih pawm tlaka chhinchhiahna a ni.

(2 Petera 1:20, 21; 2 Timothea 3:16, 17; Sam 119:105; Thufing 30:5, 6; Isaia 8:20; 17:17; 1 Thessalonika 2:13; Hebrai 4:12).

2.   Pathian Mi Pathumte:

Seventh-day Adventist-te Chuan…

Pathian pakhat a awm:  Pa, Fapa leh Thlarau Thianghlim, chatuan mi ni tlanga pumkhata awm chu.  Pathian chu thi thei lo, engkim tithei, engkim hria, engkim chunga mi leh englai pawha awm reng chu a ni.  Chin nei lo leh mihring hriatthiam theih bak, amaherawhchu Amah A inpuanchhuahna aṭanga hriat theih a ni a.  Thilsiam zawng zawng tan chatuana biak tlak, chawimawi tlak leh rawngbawlsak tlak a ni.

(Deuteronomy 6:4; Matthaia 28:19; 2 Korinth 13:14; Ephesi 4:4-6; I Petera 1:2; I Timothea 1:17; Thupuan 14:7).

3.   Pa:

Seventh-day Adventist-te Chuan…

Chatuan Pa Pathian chu Siamtu, Thilbul, Chelhdingtu, leh thilsiam zawng zawng chunga chungchuang ber a ni.  A dikin A thianghlim a, a dawhtheiin zah A ngai a, A thin a nelin, hmangaihna leh rinawm tlatnaa khat a ni.  Nunphung leh thiltihtheihnaa Fapa leh Thlarau Thianghlim tihlana awm chu Pa tihlanna pawh a ni.

(Genesis 1:1; Thupuan 4:11; I Korinth 15:28; Johana 3:16; I Johana 4:8; I Timothea 1:17; Exodus 34:6, 7; Johana 14:9).

 

4.   Fapa:

Seventh-day Adventist-te Chuan…

Pathian chatuan Fapa chu Isua Krista-in tisaah a lo chang a.  Amah hmanga thil engkim siam a ni a, Pathian nunphung tihlanna chu Amahah a ni a, mihringte tlanna tihfamkim a ni a, khawvel hi rorelsakin a awm bawk a ni.  Thlarau Thianghlim avanga paiin a awm a, nula thianghlim Marin a hring a.  Mihringte anga khawsain mihringte tawh angin thlemnate a tawk a, mahse Pathian felnaah leh hmangaihnaah chuan famkim thlapa entawntlak a ni.  Thil-mak a tihnain Pathian thiltihtheihna chu A puangchhuak a, Pathianin Messia A tiam chu Amahah hian (nemngheh) a ni a.  Kan sual avangin leh keimahni aiah Ama duhthlannain kross-ah tuarin a thi a, thihna aṭangin a tho leh a, vana hmun thianghlima kan tana rawngbawl turin vanah a lawn a.  Hun tawpa A mite hruai turin thil engkim siam ṭhatna turin ropui takin a lo kal leh dawn a ni.

(Johana 1:1-3, 14; Kolosa 1:15-19; Johana 10:30; 14:9; Rom 6:23; I Korinth 5:17-19; Johana 5:22; Luka 1:35; Philippi 2:5-11; Hebrai 2:9-18; I Korinth 15:3, 4; Hebrai 8:1, 2; Johana 14:1-3). 

5.   Thlarau Thianghlim:

Seventh-day Adventist-te Chuan…

Pathian Chatuan Thlarau Thianghlim chu Pa nen thawk zelin Fapain thil a siamnaah, tisaa a lo channaah, leh A tlannaah a thawk ve zel a.  Pathian Lehkhabu ziaktute a thawkkhum a.  Krista nun chu thiltihtheihnain a tikhat a.  Mihringte chu hipin an sualzia a hriattir a; lo dawngsawngtute chu Pathian annaah a titharin a tidanglam ṭhin.  Pa leh Fapain Pathian fate hnena awm reng turin an tir a.  Kohhran hnenah thlarau thil pekte a pe a, Krista hriatpuitu ni turin thiltihtheihnain a vur a, Pathian thu nen inmil zelin thu tak zawng zawngah mi a hruai ṭhin. 

(Genesis 1:1, 2; Luka 1:35; 4:18; Tirhkohte 10:38; 2 Petera 1:21; 2 Korinth 3:18; Ephesi 4:11, 12; Tirhkohte 1:8; Johana 14:16-18, 26; 15:26, 27; 16:7-13). 

6.   Thilsiam Thu:

Seventh-day Adventist-te Chuan…

Pathian chu thil engkim Siamtu a ni a, ani chuan Pathian Lehkhaah hian a thil siam dan dik tak leh rintlak chu a puang chhuak a.  Ni ruk chhungin Lalpa chuan “lei leh van” leh a chhunga thilnung awm zawng zawngte hi a siam a, tin, chu chawlhkar hmasa bera ni sarihna ni-ah chuan a chawl ta a.  Chutiang chuan Sabbath chu a thil siamte a zo ta a ni tih chatuana hriatrengna nî ni turin a din ta a ni.  Mihring hmasa ber, mipa leh hmeichhia kha thilsiam zinga chungchuang ber ni turin Pathianin ama anpuia a siamte an ni a, lei chung zawng zawnga thuneihna chu pein, enkawl turin mawhphurhna a pe bawk.  Khawvel hi siam zawh a nih khan “a ṭha em em a,” Pathian ropuizia a puang chhuak a ni tih an ring.

(Genesis 1:2; Exodus 20:8-11; Sam 19:1-6; 33:6, 9; 104; Hebrai 11:3).

7.   Mihring Nihphung:

Seventh-day Adventist-te Chuan…

Mihring - mipa leh hmeichhia te hi Pathian anpuia siam an ni a.  Mahnia nihna hran ve ve nei niin, zalen taka thil ngaihtuah theihna leh tih theihna pek an ni.  Zalenna neia siam ni mah se, mimal tinte chu taksa, rilru leh thlarau pumkhat, ṭhen hran theih loh nei, nunna leh thawkna, leh thil dang zawng zawngahte Pathian rinchhana awm an ni a.  Kan nu leh pa hmasa berte’n Pathian thu an awih loh takah khan, Pathiana innghat an nihna chu an phat a, Pathian hnuaia dinhmun sang tak an neihna aṭang chuan an tlahniam ta a ni.  Pathian an anna chu tihkhawbaw a ni ta a, thi tura tih an lo ni ta a ni.  An thlahte chuan an tluk taka an nihphung leh tlukna avanga thil lo thleng chu an rochung ta a.  Chaklohna leh thil sual lam awn rengin an lo piang a.  Mahse Pathian chuan khawvel hi Krista-ah inremna siamin A Thlarauin mihring thitheite chu an Siamtu annaah a siamthar leh a.  Pathian ropuina tura siam niin, Amah Pathian hmangaih tur leh anmahni inhmangaih tawn tur leh an chenna velte cheibawl turin koh an ni. 

(Genesis 1:26-28; 2:7; Sam 8:4-8; Tirhkohte 17:24-28; Genesis 3; Sam 51:5; Rom 5:12-17; 2 Korinth 5:19, 20; Sam 51:10; 1 Johana 4:7, 8, 11, 20; Genesis 2:15). 

8.   Inhnialna Ropui:

Seventh-day Adventist-te Chuan…

Pathian awm dan leh A Dan leh lei leh vana thuneitu sang ber A nihna thua Krista leh Setana inhnialna ropui takah hian mihring zawng zawngte hi an inbarh lut vek a.  Chu inbeihna chu, duhthlanna zalenna neia siam, mahni inchawisang ta mai Setana lo ni ta, Pathian hmelmaa ṭang tain, Vantirhkoh engemaw zat hel tura a hruai tak aṭanga vana lo inṭan a ni a.  Helna rilru chu Evi leh Adama suala a hruai luh khan khawvelah a la lut a.  He mihring sualna hian mihringa Pathian anna a tikhawbaw a, khawvel thil siamah an awm ang tura awm lohna thil a thlen a, a tawpah khawvel pum huapa tuiletin khawvel hi a tiṭiau ta a.  Thilsiam zawng zawngte han thlirin, he khawvel hi khawvel puma inbeihna hmun a lo chang ta, chumi aṭang chuan Pathian hmangaihna chu a tawp a tawpah chuan dinchantirin a awm ang.  He inhnialnaa mite pui turin, Pathian chuan Thlarau Thianghlim leh chhandamna kawnga kaihruai tur te, venghim tur te leh chawm lian turtein vantirhkoh ṭhate a tir a. 

(Thupuan 12:4-9; Isaia 14:12-14; Ezekiela 28:12-18; Genesis 3; Rom 1:19-32; 5:12-21; 8:19-22; Genesis 6:8; 2 Petera 3:6; 1 Korinth 4:9; Hebrai 1:14). 

9.   Krista Nunna, Thihna leh Thawhlehna:

Seventh-day Adventist-te Chuan…

Pathian duhdan famkim taka Kristan a zawmnaah te, A tawrhnaah te, A thihnaah te, A thawh lehnaah te, Pathian chuan mihringte sual laka tlenfai an nihna kawng awm chhun A siam a, chutichuan chu tlenfaina chu rinnaa pawmtute chuan chatuan nunna an nei theiin, thil siam zawng zawngte chuan siamtu hmangaihna chhuichhuah zawh rual loh leh thianghlim chu hriatna ṭha zawk an nei thei ang.  He tlenfaina famkim hian Pathian Dana felna leh A hmangaihna nungchang chu a dinchantir a, heng thil pahnihte hi kan sual thiamloh min chantirna leh ngaihdamna min siamsaktu an ni.  Krista thihna chu aiawh leh tihlungawina, inremna leh tihdanglamna a ni.  Krista thawhlehna chuan sual thiltihtheihna hneh a nihna puangin, chu tlenfaina rinnaa pawmtute hnenah chuan a tawpa sualna leh thihna hneh tiam a ni.  Isua Krista chu Lal a nih thu puangin, a hmaah chuan van leh leia khup tinreng an kun tur a ni.

(Johana 3:16; Isaia 53; 1 Petera 2:21, 22; 1 Kornth 15:3, 4, 20-22; 2 Korinth 5:14, 15, 19-21; Rom 1:4; 3:25; 8:3, 4; 1 Johana 2:2; 4:10; Kolossa 2:15; Philippi 2:6-11). 

10. Chhandamna Daihriatna:

Seventh-day Adventist-te Chuan…

Pathian hmangaihna leh zahngaihna chhuichhuah zawh rual loh chuan, Amahah chuan Pathian felna kan lo nih theihna turin, sual reng reng hre lo Krista chu, keimahni avangin sualah a siam a.  Thlarau Thianghlima hruaia awmin kan mamawh te kan hria a, kan sualzia kan inhmuchhuak a, kan bawhchhiatnaah te kan inchhir a, Isua chu Lal leh Kristaah, kan Aiawhtuah leh kan Entawn tur atan rinna kan nei a ni.  He rinna chhandamna dawnna hi Pathian thu thiltihtheihna aṭanga lo kal a ni a, Pathian khawngaihna thilpek a ni.  Krista zarah chuan thiamchantirin kan awm a, Pathian fapa leh fanuah te siamin kan awm a, sualin kan chunga ro a relna aṭangin chhanchhuahin kan awm.  Thlarau zarah kan piangtharin tihthianghlim kan ni a:  Thlarau chuan kan rilru a tithar a, Pathian hmangaihna Dan chu kan thinlungah a ziak a, thianghlimna nun hman theihna thiltihtheihna min pe a ni.  Amahah awmin Pathian nungchang latute kan lo ni a, tunah leh rorelna lo awm tura chhandamna thutiam chu kan nei a ni. 

(2 Korinth 5:17-21; Johana 3:16; Galatia 1:4; 4:4-7; Tita 3:3-7; Johana 16:8, Galatia 3:13, 14; 1 Petera 2:21, 22; Rom 10:17; Luka 17:5; Marka 9:23, 24; Ephesi 2:5-10; Rom 3:21-26; Kolosa 1:13-14; Rom 8:14-17; Galatia 3:26; Johana 3:3-8; 1 Petera 1:23; Rom 12:2; Hebrai 8:7-12; Ezekiela 36:25-27; 2 Pet.  1:3, 4; Rom 8:1-4; 5:6-10). 

11. Kristaa Ṭhan Len Zelna (Growing in Christ)

Kraws-a a thihna avang khan Isua chuan sual thiltihtheihnate lakah hnehna a chang tawh a. A lei rawngbawl laia ramhuai thlaraute lo tukzal tawhtu chuan an thiltihtheihna pawh tihchahsakin, chatuana an chan tur chu a lo rel fel tawh bawk a ni. Isua hnehna chuan min thunun la tum rengtu sual thiltihtheihna lak ata hnehna min pe a, amah nena leng dunin thlamuanna te, lawmna te, leh a hmangaihna te chu kan lo chang ṭhin. Tunah hian Thlarau Thianghlim chuan min chenchilhin thiltihtheihna min pe a. Isua chu kan Chhandamtuah leh kan Lalpa-ah pawm chhunzawm zelin tun hma lama kan thil sual tih tawhte phurrit lak ata chhuah zalen kan ni ta a. Thim hnuaia leng, sual thiltihtheihna hlau, leh hriatna reng nei lo ang kha kan ni tawh lo va, kan nun dan hlui awmze nei lo pawh chu kan lo kalsan ta bawk. He zalenna thar, Isua zara kan lo neih tak achinah hian ama nungchang ang chu pu ve tura ṭhang lian chho zel tur te, ṭawngṭaia ni tin amah pawl ṭhin tur te, a thua chawm ni tur te, thinlung taka a venhimna ngaihtuah ṭhin tur te, a fakna hla sa ṭhin tur te, amah chibai buka inkhawm ṭhin tur te, leh kohhran rawngbawlnaa inhmang ve ṭhin tur tea koh kan ni a. Kan vela awmte hnena a chhandamna thu kan hriattir a, hmangaih taka an rawng kan bawlsak hian, a Thlarau hmanga min awmpui rengna chuan kan thiltih tinreng leh kan hun tawng apiang hi kan thlarau nun chawi kangtuah a siam ṭhin a ni.

(1 Chro. 29:11; Sam 1:1, 2; 23:4; 77:11, 12; Mt. 20:25-28; 25:31-46; Lk. 10:17-20; Joh. 20:21; Rom 8:38, 39; 2 Kor. 3:17, 18; Gal. 5:22-25; Eph. 5:19, 20; 6:12-18; Phil. 3:7-14; Kol. 1:13, 14; 2:6, 14, 15; 1 Thes. 5:16-18, 23; Heb. 10:25; Jak. 1:27; 2 Pet. 2:9; 3:18; 1 Joh. 4:4.)

12. Kohhran:

Seventh-day Adventist-te Chuan…

Kohhran hi Krista chu Lal leh Chhandamtu a ni tih puanga ringtu inpawlho a ni a.  Thuthlung Hlui huna Pathian mi nihna chhunzawm zelin, khawvel aṭanga koh chhuah kan ni a; Pathian be turin, keimahni inpawlho turin, Pathian thua kaihhruaina dawng turin, Lalpa zanriah kil tlang turin, mihringte rawngbawl turin, khawvel ram tina Chanchin Ṭha puang turin kan inzawm khawm a.  Kohhran hian a thuneihna hi Thu tisaa lo chang Krista hnen aṭangin leh, Pathian Thu ziaka awm aṭangin a dawng a.  Kohhran hi Krista taksa, Krista ngei chu lu atana ringa inpawlhote an ni.  Kohhran hi Krista mo, A tihthianghlima silfaia a awm theih nana Kristan a thihsak chu a ni.  Hnehna changa a lo kal leh hunah chuan kohhrana rinna lo nei tawh zawng zawng te, A thisena a leite chu bawlhhlawh kai lo leh zur lo leh thianghlim leh hmelhem lova awm zawkin, ropui takin Krista chuan Ama hmaah ngei a tar chhuak dawn a ni. 

(Genesis 12:3; Tirhkohte 7:38; Ephesi 4:11-15; 3:8-11; Matthaia 28:19, 20; 16:13-20; 18:18; Ephesi 2:19-22, 23; 5:23-27; Kolosa 1:17, 18). 

13. Kohhran La Bang Leh Tirh A Nihna:

Seventh-day Adventist-te Chuan…

Khawvel pum huapa kohhran hian Krista ringtu tak takte a fun vek a, mahse ni hnuhnung zirtirna dik lo a hluar hlenna hunah hian, a la bang chu Pathian thupekte zawma Isua rinna vawng tura koh a ni a.  Chu a la bang chuan, rorelna lo thlen tak hun puangin, Krista zara chhandamna thu au chhuahpuiin, ṭumhnihnaa Krista lo kal lehna tur hun hnaih tawhzia a tlangaupui a ni.  Chung thu puanchhuahna chu Thupuan bung 14-naa vantirhkoh pathumte chuan entir an ni a; vana rorelna hnathawh kalpui mekna te, leia simna leh siamṭhatna hnathawh awm mekte rah nen an inmil a.  Ringtu tinte hi khawvel ram puma hriatpuitu nihnaah mahni ngeia chanvo nei ṭheuh tura koh an ni.  

(Thupuan 12:17; 14:6-12; 18:1-4; 2 Korinth 5:10; Juda 3:14, 1 Petera 1:16-19; 2 Petera 3:10-14; Thupuan 21:1-14). 

14. Krista Taksaa Inpumkhatna:

Seventh-day Adventist-te Chuan…

Kohhran hi hnam tinreng, chi tinreng, ṭawng tinreng leh mi tinrengte aṭanga koh mi leh sa (members) tam tak pumkhata insiam a ni.  Kristaah chuan thilsiam thar lo niin, hnam, hnam tih dan zirna leh hnam inan lohna te, mi ropui leh hniam, hausa leh rethei, mipa leh hmeichhia nihnaa indaidannate hi kan zingah min ṭhen hrangtu tur an ni tur a ni lo.  Thlarau pakhata Amah nen inpawl a, midangte nen inpawl tlang tura min phuarkhawmtu Kristaah chuan inangkhat vek kan ni a; Hleih nei lo leh inkiltawihna awm lova rawngbawl a, rawng inbawlsak tur kan ni.  Pathian Lehkhabua Isua Krista a inpuanchhuahna avangin rinna leh beiseina hmunkhat kan inṭawm a, hriattirna hmunkhatin kan inpawh tlang vek a.  He inpumkhatna hi Pathiana Mi pathum inpumkhatna aṭanga lo chhuakin, chutah chuan Pathian faa vuahin kan awm a ni. 

(Rom 12:4, 5; 1 Korinth 12:12-14; Matthaia 28:19, 20; Sam 133:1; 2 Korinth 5:16, 17; Tirhkohte 17:26, 27; Galatia 3:27, 29; Kolosa 3:10-15; Ephesi 4:14-16; 4:1-6; Johana 17:20-23). 

15. Baptisma:

Seventh-day Adventist-te Chuan…

Baptisma kan chan hian Isua Krista thihna leh thawhlehnaah rinna kan neih kan puang a, sual lama kan thihna leh nun thara nun kan tumna kan puang chhuak a ni.  Chutiang chuan Krista chu kan Lal leh Chhandamtua pawmin, a mite kan lo ni a, Kohhranin a mi leh saah min lawm lut a ni.  Baptisma channa hi Krista nen pumkhat kan nihna, sual ngaihdam kan nihna, Thlarau Thianghlim kan chan entirna a ni.  Tuia inhnimphuma chan a ni a.  Isuaa kan rinna tihnghehna leh sual simna kan neih lantirna chunga innghat a ni.  Pathian Lehkhabu Thianghlim zirtirna zuina a ni a, a zirtirna pawmna a ni. 

(Rom 6:1-6; Kolosa 2:12, 13; Tirhkohte 16:30-33; 22:16; 2:38; Matthaia 28:19, 20). 

16. Lalpa Zanriah:

Seventh-day Adventist-te Chuan…

Lalpa zanriah hi Isua taksa leh thisen entirna, Amah chu kan Lal leh Chhandamtua kan rinna puanchhuahnaa kil a ni.  He inpawlhonaa tel venaah hian Krista chu A mite pawl tur leh tichak turin A lo tel ve ṭhin a ni.  Lalpa zanriah kan kil hian, A lo kal leh hma loh chu Lalpa thihna chu hlim takin kan puang a ni.  Lalpa zanriah kil tura inpuahchahnaah chuan mahni inenfiahna, simna leh sual puanna an tel a.  Silfaia kan awm thar lehna entir nan, Krista inngaihtlawmna rawng inbawlsak tawn kan duhna puanchhuah nan, kan thinlungte hmangaihna kan insuihfin nan Zirtirtu chuan ke sil rawngbawlna a ruat a.  Lalpa zanriah hi ringtu Kristian zawng zawngin an tih tura phal a ni. 

(1 Korinth 10:16, 17; 11:23-30; Matthaia 26:17-30; Thupuan 3:20; Johana 6:48-63; 13:1-17). 

17. Thlarau Thilpekte Leh Rawngbawlna:

Seventh-day Adventist-te Chuan…

Pathian chuan eng lai pawhin A Kohhran mi leh sa zawng te chungah chuan Kohhran leh mihringte ṭhat tlanna tura hmangaiha rawngbawl nana hman turin thlarau thilpek a hlan a.  Mi tin hnenah A duh ang zela bithliahin Thlarau Thianghlim chu petuah a ṭang a.  Kohhranin Pathian ruat anga a tih turte a tihfamkim theih nan thilpekte chuan theihna leh rawngbawlna zawng zawng a pe a.  Pathian Lehkhabuah chuan, he thilpekte hian rinna, tihdamna, thuhrilhna, Chanchin Ṭha puanchhuahna zirtirna, Kohhran awpna, inremna, khawngaihna, rawngbawl nana mahni inphatna, mite ṭanpuina tura hmangaihna te leh mite fuihna rawngbawlna a huap vek a ni.  Mi ṭhenkhatte chu Pathianin a ko a, Kohhranin a pawmpui Kohhran chawmna, tirhkoh nihna, zirtir nihna leh zirtirna rawngbawlna nei tura memberte thuam mamawh an nihna bik atan, thlarau lama Kohhran puitling tura din chhoh nan, Pathian rinna leh hriatnaa pumkhatna chawm nan mi ṭhenkhatte chu Thlarau chuan thuamin an awm a.  Pathian khawngaihna chi hrang hrang kawltu rinawm tak nia Kohhran mi leh saten he thilpek hi an hman chuan, Kohhran chu thurin dik lovin a tihboralna tura a hnehna aṭanga humhimin a awm ang a, ṭhanna Pathian hnen aṭanga lo chhuak chuan an ṭhang a, rinna leh hmangaihnaah chuan dinnghehin an awm ang. 

(Rom 12:4-8; 1 Korinth 12:9-11, 27, 28; Ephesi 4:8, 11-16; Tirhkohte 6:1-7; 1 Timothea 2:1-3; 1 Petera 4:10, 11). 

18. Hrilhlawkna Thilpek:

Seventh-day Adventist-te Chuan…

Thlarau Thianghlim thilpek pakhat chu hrilhlawkna a ni.  He thilpek hi Kohhran la bang chhinchhiahna a ni a, Ellen G. White-i rawngbawlnaah puan chhuahin a awm a.  Lalpa palai niin a thuziakte chu Kohhran tan thlamuanna, kaihhruaina, zirtirna leh hruai dikna chhunzawm zelna leh thuneihna a ni.  A thuziakte chuan Bible hi zirtirna leh thil dawnte fiahna tura tehfung a ni tih a sawi chiang. 

(Joela 2:28, 29; Tirhkohte 2:14-21; Hebrai 1:1-3; Thupuan 12:17; 19:10). 

19. Pathian Dan:

Seventh-day Adventist-te Chuan…

Pathian dan thupekte chu Thusawmpek-ah hian phuah khawmin an awm a.  Krista nunah tar lan an ni a.  Mihringte awm dan tur leh inlaichin dan tur atana Pathian hmangaihna, duhsakna leh thiltumte an puang chhuak a, eng hun laia mi pawh a huap vek.  Heng thupekte hi Pathianin mihringte nena thu a thluna a nghahchhan Pathian rorelna tehfung an ni.  Thlarau Thianghlim hnathawhna azarah sualna an thai lang a.  Chhandamtu mamawha inhriatna thinlungah a chawkharh a.  Chhandamna hi hnathawh avang a ni lo va khawngaihna a ni vek a, mahse a rah chu Thupekte zawmna a ni.  He thuawihna hian Kristian nungchang a chher a, ṭhatna thinlung mi a puttir ṭhin.  Lalpa kan hmangaiha kan mihringpuite kan ngaihsak a ni tih tichiangtu a ni.  Rinnaa thuawihna chuan nun tidanglam tura Krista thiltihtheihna a entir a, tichuan Kristian hriatpuitu a nihna a tichak ṭhin a ni. 

(Exodus 20:1-17; Sam 40:7, 8; Matthaia 22:36-40; Deuteronomy 28:1-14; Matthaia 5:17-20; Hebrai 8:8-10; Johana 16:7-10; Ephesi 2:8-10; 1 Johana 5:3; Rom 8:3, 4; Sam 19:7-14).

20. Chawlhni:

Seventh-day Adventist-te Chuan…

Thil ṭha duha Siamtu chuan, ni ruk chhung thil A siam hnuah, a ni sarihna niah chuan a chawl a, thilsiam hriat reng nan mi zawng zawng tan Chawlhni a din a.  Thlak danglam theih loh Pathian thupek palina chuan, ni sarihna Chawlhni chu, Chawlhni Lalpa, Isua zirtirna leh tih dan ṭhin nen inmila chawlh nan, Pathian biak nan leh rawngbawlna ni ni turin a phut a ni.  Chawlhni chu Pathian leh keimahni kan inpawlna ni hlimawm tak a ni.  Kristaah chuan tlana kan awm entirna, tihthianghlim kan awm chhinchhiahna, kan thuawihna tarlangtu, Pathian lal ram chatuana kan hmaa lo awm tur tem lawkna a ni.  Chawlhni chu Amah leh A mite inkara chatuan Thuthlung Pathianin kumkhua atana chhinchhiahna a ni.  Tlai aṭanga tlai leh thleng, ni tlak aṭanga ni tlak leh thlenga hlim taka he hun thianghlim serhna hi, Pathian thilsiamna leh tlanna chawimawina a ni. 

(Genesis 2:1-3; Exodus 20:8-11; Luka 4:16; Isaia 56:5, 6; 58:13, 14; Matthaia 12:1-12; Exodus 31:13-17; Ezekiela 20:12, 20: Deuteronomy 5:12-15; Hebrai 4:1-11; Leviticus 23:32; Marka 1:32). 

21. Sum Enkawltu Nihna:

Seventh-day Adventist-te Chuan…

Hun leh remchanna te, theihna leh thil neih te, lei malsawmna leh a lo kalna hnarte nena kawltir Pathian sum enkawltute kan ni.  A tana dik taka hman an nih nan mawh kan phur a ni.  Rinawm taka Amah leh kan mihringpuite rawngbawlnain, A Chanchin Ṭha puan nan leh Kohhran chawm nan leh ṭhan nan sawma pakhat pein Pathian chu neitu a ni tih kan pawm a.  Sum enkawltu nihna hi hmangaiha chawm kan nih nan leh mahni hmasialna leh duhamna kan hneh theihna Pathianin remchang min pek a ni.  Sum enkawltu chu a rinawm avanga mi dangte hnena malsawmna lo thlengah hian a lawm ṭhin. 

(Genesis 1:26-28; 2:15; 1 Chronicles 29:14; Hagaia 1: 3-11; Malakia 3:8-12; 1 Korinth 9: 9-14; Matthaia 23:23; Rom 15:26, 27). 

22. Kristian Nun Hman Dan:

Seventh-day Adventist-te Chuan…

Van lam dan nena inmila ngaihtuah a, hria a, thil ti ṭhin, Pathian mi tak ni tura koh kan ni a.  Lalpa nungchang ang keimahniah Thlarauvin a siamthar dawn chuan Krista enga thianghlimna leh hriselna leh kan nuna hlimna thlen thei tur thilah chauh kan inhnamhnawih tur a ni.  Chu mi awmzia chu, kan intihhlimna te, kan inpawlhona te chuan Kristian tana duhawm leh mawi dinhmun sang ber a thleng tur a ni.  Hnam chin dan ze hrang hrang a awm tih hre reng chungin, kan incheina chu a mawlin, a hleihluai lovin, a felin, mawina tak tak chu pawn lam incheina ni lovin, rilrua thuhnuairawlh leh nunnem silhfen chhe thei lova inthuam tih tling a ni tur a ni.  Kan taksa hi Thlarau Thianghlim chenna in a nih avangin, fing takin kan enkawl tur a ni tih a kawk bawk a.  Insawizawina leh hahdamna tam tawk neiin, kan tana hriselna ber tur chaw ei a, Pathian Lehkhabuin ei tur atana bawlhhlawh a tihte lak aṭanga insumin kan awm tur a ni.  Zu te, vaihlo te, awmze nei lova ruih hlo hman te, ruih theih thil dang te hi kan taksa tana a hlauhawm avangin, heng zawng zawng lak aṭang hian kan insum hlauh tur a ni.  Chung aiah chuan, kan damna, hlimna leh ṭhatna min duhsaktu Krista thununna hnuaiah kan ngaihtuahna leh kan taksa chu kan thlen zawk tur a ni a. 

(Rom 12:1, 2; 1 Johana 2:6; Ephesi 5:1-12; Philippi 4:8; 2 Korinth 10:5; 6:14; 7:1; 1 Petera 3:1-4; 1 Korinth 6:19, 20; 10:31; Leviticus 11:1-47; 3 Johana 2).

23. Inneihna Leh Chhungkua:

Seventh-day Adventist-te Chuan…

Inneihna hi Eden huana Pathianin a din, hmeichhia leh mipa dam chhung zawng inkawp tura Isuan a nemngheh a ni a.  Kristian tan chuan inneihna hi Pathian leh kan kawppui te laka kan inhlanna a ni.  Rinna hmunkhata awm te chauh khingpuia insiamna tur a ni.  Inhmangaih, inchawimawi, inzah tawnna leh mawhphurh tawnna te hi inlaichinna hrui, Krista leh A kohhran inkara inlaichinna hmangaihna te, thianghlimna te, inelna te, nghehna te, tarlang chhawngtu tur a ni.  Inmakna thuah, Isua chuan inngaih vang ni lova a khingpui maa mi dang nei chu a uire a ni tih a zirtir a.  Chhungkaw ṭhenkhat inlaichinnaah duhthusam thleng lo mah se, inneihnaa inkhingte Krista hnena inhlan tak takte chuan Thlarau Thianghlim hruaina leh Kohhran chawmnain hmangaiha inpumkhatna dinhmun thlen theih a ni.  Pathian chuan chhungkua a hmangaih a, Chhungkuaa mitinte chu puitlinna famkim thleng tura inṭanpui tawntir a tum a.  Nu leh pate chu Lalpa hmangaiha A thu awih turin an fate chawm lian tur an ni.  An nun leh an thusawiin Krista chu zaidam leh anmahni ngaihsak rengtu, A taksa peng hrang leh Pathian chhungkua ni tura duhsaktu, hmangaiha thununtu a ni tih hi an zirtir ṭhin tur a ni.  Chhungkaw inngeihna lo ṭhan chhoh zelna hi Chanchin Ṭha thuchah hnuhnungin min chimna chhinchhiahna a ni.

(Genesis 2:18-25; Matthaia 19:3-9; Johana 2:1-11; 2 Korinth 6:14; Ephesi 5:21-33; Matthaia 5:31, 32; Marka 10:11, 12; Luka 16:18; 1 Korinth 7:10, 11; Exodus 20:12; Ephesi 6:1‑4; Deuteronomy 6:5-9; Thufingte 22:6; Malakia 4:5, 6). 

24. Van (Biakbuk) Krista Rawngbawlna:

Seventh-day Adventist-te Chuan…

Vanah, (Biakbuk) mihring sak ni lo, Lalpa sak zawk biakbuk tak tak a awm a ni.  Chutah chuan Krista chuan rawng a bawl a.  Kross-a tlenfaina tura mi zawng zawng tana vawi khata a lo thih tlingtlak tawh hnemhnanna chu ringtu tinten dawn theihin a siam a.  Vana a lawn khan kan Puithiam Lalber ropui tak hna chu chelh ṭanin mi A sawipuina hna chu a ṭan nghal a.  Kum 1844 kuma ni 2300 hrilhlawkna a lo tawp khan, tlenfaina hna a thawhna hmun pahnihna leh A rawngbawlna hun tawp berah chuan a lut ṭan a.  Chu chu hmanlaia Hebrai mite hmun thianghlim Tlenfaina Nia tlenfaina an lo neih ṭhinin a entir sualna zawng zawng a tawpa tihboralna tur hna pakhat, rorel lawkna (investigative judgement) hna a ni.  Chu entirna rawngbawlnaah chuan hmun thianghlim chu inthawina ran thisena thenfai a ni ṭhin a, mahse van lama mi chu inthawina famkim Isua thisena tlenfai a ni.  Chu rorel lawkna chuan van mipuite hnenah, Kristaa muhil tawh, Krista veka thawhlehna hmasaa tel tlakte chu a tilang dawn a ni.  Kristaa awma nung dama la awmte zingah Pathian thupekte zawma Isuaa rinna vawngtute, chatuan lal rama lut tura Krista avanga tihdanglam ni tura inpeihte pawh chu rorel lawkna chuan a puang chhuak bawk a.  He rorelna hian, Isua ringtute chhandam an nihnaah Pathian dikna a dinchantir a ni.  Pathiana rinawma awm rengte chuan lal ram chu an chang dawn tih a puan dawn a ni.  Chu Krista rawngbawlna tihfamkim a nihna hun chu Krista lo kal leh hmaa mihringte tana khawngaihna kawngkhar tawpna chhinchhiahna a ni ang.

(Hebrai 8:1-5; 4:14-16; 9:11-28; 10:19-22; 1:3; 2:16, 17; Daniela 7:9-27; 8:13, 14; 9:24-27; Number 14:34; Ezekiela 4:6; Leviticus 16; Thupuan 14:6, 7; 20:12; 14:12; 22:12). 

25. Krista Lo Kal Lehna:

Seventh-day Adventist-te Chuan…

Krista lo kal vawihnihna hi Kohhran tan beiseina lawmawm Chanchin Ṭha vawrtawp ropui tak a ni.  Chhandamtu lo kal lehna chu a tak tak, Amah ngei, hmuh theih leh khawvel pumpui huapa hriat tur a ni dawn.  A lo kal leh hunah chuan mifel thi tawhte chu kaihthawh an ni ang a, mifel nungdama lo la awmte chu tihropui an ni ang a, chungho nen chuan vanah hruai chhohvin an awm dawn a ni, mahse mifel lote chu an thi dawn a ni.  Hrilhlawkna thlur tam zawk lo thlen famkim vek deuh thaw tawhna leh tuna kan khawvel dinhmun nena ṭangkawp hian, Krista lo kal lehna chu a hnai tawh a ni tih an tarlang.  Chu hun lo thlen hun tur chu puan a ni lo va, chuvang chuan eng lai pawha inring reng tura fuih kan ni. 

(Tita 2:13; Hebrai 9:28; Johana 14:1-3; Tirhkohte 1:9-11; Matthaia 24:14; Thupuan 1:7; Matthaia 26:43, 44; 1 Thessalonika 4:13-18; 1 Korinth 15:51‑54; 2 Thessalonika 1:7‑10; 2:8; Thupuan 14:14-20; 19:11-21; Matthaia 24; Marka 13; Luka 21; 2 Timothea 3:1‑5; 1 Thessalonika 5:1‑6). 

26. Thihna leh Thawhlehna:

Seventh-day Adventist-te Chuan…

Sual man chu thihna a ni.  Mahse Pathian chauh hi thi thei lo a ni a.  A tlante chu chatuan nunna a pe dawn a ni.  Chu mi hma chu thihna hi mi zawng zawng tan engmah hre lova awmna a ni.  Krista, kan nunna chu, a lo lan hunah, mi fel kaihthawha awm tate leh mifel nungdama lo la awmte chu tihropui an ni ang a, Lalpa tawk turin lak chhohvin an awm dawn a ni.  Thawhlehna vawi hnihna, mi fel lote kaihthawhna chu, chu mi hnu kum sangkhat hnua lo awm tur a ni. 

(Rom 6:23; 1 Timothea 6:15, 16; Thupuan 9:5, 6; Sam 14:3, 4; Johana 11:11‑14; Korinth 15:51‑54; 1 Thessalonika 4:13-17; Johana 5:28, 29; Thupuan 20:1-10). 

27. Kumsang Rorel Leh Sual Tawpna:

Seventh-day Adventist-te Chuan…

Kumsang rorel hi thawhlehna hmasa leh thawhlehna vawi hnihna inkara A mi thianghlimte nen Kristan kum sang khat chhung ro a rel hun tur a ni.  He mi hun chhung hian mi sual thia awmte chu rorelsakin an awm ang a, lei chu tiṭiau derin, mihring nungdam, luahtu awm lovin, mahse Setana leh a vantirhkohte luahin a awm dawn a ni.  Chu rorel zawhah chuan Krista chu A mi thianghlimte nen, khaw thianghlim nen van aṭangin leiah an rawn chhuk dawn a ni.  Mi fel lo thia awmte kha, chutih hunah chuan kaihthawhin an awm ang a, Setana leh a vantirhkohte chuan khawpui chu an hual ang a; mahse Pathian hnen aṭanga meiin anni chu a kang ral ang a, lei chu a tithianghlim ang.  Tichuan khawvel pumpui chu mi sualte leh sualna lak aṭang chuan a zalen tawh dawn a ni. 

(Thupuan 2:20; 1 Korinth 6:2, 3; Jeremia 4:23-26; Thupuan 21:1-5; Malakia 4:1; Ezekiela 28:18, 19). 

28. Lei Thar:

Seventh-day Adventist-te Chuan…

Lei thar, mi felte chennaah chuan, Pathian chuan tlante tan chatuan in a pe ang a, chatuan nunna, hmangaihna, hlimna boruak famkim tak hnuaia Ama ang chhunga zirna nen.  Hetah hian Pathian chu A mite hnenah chuan a cheng ang a, tawrhna te, thihna te a awm tawh lo vang a.  Inhnialna ropui tak chu a tawp tawh ang a, sual pawh a awm tawh hek lo vang.  Thil engkim, nunna nei leh nei lote chuan Pathian chu hmangaihna a ni tih an puang ang a; tichuan chatuanin ro a rel ang.  Amen. 

(2 Petera 3:13; Isaia 35:65; 17-25; Matthaia 5:5; Thupuan 21:1-7; 22:1-5; 11:15).

 

 

Zawnawlna

Zawnawlna: Kum

Sabbath School

  Zirlai Download-na:

1. Naupang: Beginner (0-2), Kindergarten (3-4), Primary (5-9).

2. Junior & Tleirawl: PowerPoints (Junior, 10-12), Real-Time Faith, Download (Teens, 13-14).

3. Ṭhalai: CornerstoneConnections (Youth, 15-18) App, inVerse (Young Adult, 18 or 19-30+)

4. Puitling: International Adult Bible Study Guides (Mizo pawh a awm ṭhin).

  Rawngbawlna Chanchin Download-na:

1. Naupang: Children's Mission Quarterly 

2. Puitling: Youth & Adult Mission Quarterly

Seventh-day Adventists SDA Mizo

• Facebook Page: Seventh-day Adventist SDA Mizo
  
• Facebook Group: Seventh-day Adventist SDA Mizo
  

Mizo Conference of SDA

• Address: Seventh-day Tlang, Vaivakawn Aizawl, Mizoram, India 796009 
• Contact: 0389 2345337
• Pin Code: 796009
• Facebook Page: Mizo Conference of SDA 
• Facebook Group: Mizo Conference of Seventh-day Adventists 
• Website: http://www.awrmizoram.gcnetadventist.org/ 

Adventist Youth Ministries (fb group): Zawnawlna